மத்திய வங்கியின் நாணயச்சபை இன்று, 2019 ஏப்பிறல் 08, நடைபெற்ற அதன் கூட்டத்தில் கொள்கை வட்டி வீதங்களை அவற்றின் தற்போதைய மட்டங்களில் பேணுவதற்கு தீர்மானித்துள்ளது. அதன்படி, மத்திய வங்கியின் துணைநில் வைப்பு வசதி வீதம் மற்றும் துணைநில் கடன் வழங்கல் வசதி வீதம் என்பன முறையே 8.00 சதவீதமாகவும் 9.00 சதவீதமாகவும் காணப்படும். பொருளாதாரம் அதனது சாத்தியப்பாட்டு மட்டத்தை அடைவதனை இயலுமைப்படுத்தும் விதத்தில் நடுத்தர காலத்தில் பணவீக்கத்தினை நடு ஒற்றை இலக்க மட்டங்களில் உறுதியாக பேணவேண்டியதன் பரந்த நோக்குடன், உள்நாட்டுப் பொருளாதாரம், நிதியியல் சந்தை அதேபோன்று உலகளாவிய பொருளாதாரத்தின் அபிவிருத்திகள் என்பவற்றின் தற்போதைய மற்றும் எதிர்கால அபிவிருத்திகளை மிகக்கவனமாக பகுப்பாய்வு செய்ததன் பின்னர் நாணயச்சபை இத்தீர்மானத்தினை மேற்கொண்டது. 

தேசிய நுகர்வோர் விலைச் சுட்டெண்ணின் (தேநுவிசு, 2013=100)  ஆண்டுக்கு ஆண்டு மாற்றத்தினால் அளவிடப்பட்டவாறான முதன்மைப் பணவீக்கம் தளத்தாக்கத்தின் பிரதானமான காரணத்தினால் 2019 சனவரியின் 1.2 சதவீதத்திலிருந்து 2019 பெப்புருவரியில் 2.4 சதவீதமாக அதிகரித்தது. இதேவேளையில், ஆண்டுக்கு ஆண்டு உணவல்லாப் பணவீக்கமானது 2019 சனவரியின் 6.5 சதவீதத்திலிருந்து 2019 பெப்புருவரியில் 6.7 சதவீதத்திற்கு அதிகரித்திருந்த வேளையில், உணவுப் பணவீக்கமும் 2019 சனவரியின் -4.8 சதவீதத்திலிருந்து 2019 பெப்புருவரியில் -2.9 சதவீதத்திற்கு அதிகரித்தது.