ශ්‍රී ලංකාවේ මේ දක්වා භාවිත වූ ව්‍යවහාර මුදලේ ඉතිහාසය පිළිබඳ මාහැඟි ග්‍රන්ථයක් “ව්‍යවහාර මුදල් නිකුතුව හා කළමනාකරණයේ සැත්තෑ වසරක ගමන්මඟ” නමින් එළි දක්වා ඇත. ශ්‍රී ලංකා මහ බැංකුවේ සන්නිවේදන දෙපාර්තමේන්තුවේ හිටපු අධ්‍යක්ෂිකා (විශ්‍රාමික) ශෙලෝමි එච්. ගුණවර්ධන මෙනෙවිය සහ ජ්‍යේෂ්ඨ කළමණාකරු (විශ්‍රාමික) ඩබ්. එම්. කේ. වීරකෝන් මහතාගේ සම කර්තෘත්වයෙන් එළි දුටු මෙම ග්‍රන්ථය ශ්‍රී ලංකා මහ බැංකුවේ ප්‍රකාශනයකි.
ශ්‍රී ලංකාවේ ව්‍යවහාර මුදලේ ඉතිහාසය පිළිබඳ උනන්දුවක් දක්වන බැංකුකරුවන්, සිසුන්, නාණක ශාස්ත්‍රඥයන් සහ සාමාන්‍ය පාඨකයන්ගේ පරිශීලනය සඳහා මෙම ප්‍රකාශනය සම්පාදනය කිරීමේ දී, කර්තෘවරුන් විසින් ශ්‍රී ලංකා මහ බැංකුවේ ව්‍යවහාර මුදල් දෙපාර්තමේන්තුවෙහි සේවය කිරීමෙන් ලද වසර ගණනාවක අත්දැකීම් ඊට උපයෝගී කොට ගෙන ඇත. පුරාණ කාලයේ සිට ශ්‍රී ලංකාවේ භාවිත කරන ලද ව්‍යවහාර මුදල් නෝට්ටු සහ කාසිවල ආකර්ෂණීය වර්ණ ඡායාරූප රාශියක් ඒවායෙහි ඓතිහාසික විස්තරයන් ද සහිතව මෙහි අඩංගු ය. එමඟින් පසුගිය සැත්තෑ වසරක කාලය පුරා රටේ පැවති දේශපාලනික, ආර්ථික සහ සංස්කෘතික පසුබිම පිළිබඳ දැක්මක් ද මෙම ග්‍රන්ථය මගින් සැපයෙයි.
ශ්‍රී ලංකා මහ බැංකුවේ, වාර්ෂික ප්‍රකාශනයක් වන “ශ්‍රී ලංකාවේ ආර්ථික හා සමාජ සංඛ්යාන - 2021” මහජනතාවගේ පරිශීලනය සඳහා දැන් නිකුත් කර ඇත.
පාර්ලිමේන්තු සභාවේ ද අනුමැතිය ඇතිව, අතිගරු ජනාධිපති ගෝඨාභය රාජපක්ෂ මහතා විසින් ජනාධිපති නීතීඥ, සංජීව ජයවර්ධන මහතා 2027 ජූනි 6 වන දා තෙක්, වසර 6ක නව ධුර කාලයක් සඳහා ශ්‍රී ලංකා මහ බැංකුවේ මුදල් මණ්ඩලයට යළි පත් කරන ලදී.
