2017 වසරේ ශ්‍රී ලංකා සෞභාග්‍යය දර්ශකය, 2016 වසරේ දී වාර්තා කළ 0.661 සිට 0.771 දක්වා වර්ධනය විය. මේ සඳහා 'ආර්ථික සහ ව්‍යාපාර පරිසරය' සහ 'සමාජ-ආර්ථික යටිතල පහසුකම්' උපදර්ශකයන්හි සිදු වූ වර්ධනයන් ප්‍රධාන වශයෙන් හේතු විය. 2017 වසර තුළ ආර්ථික සහ ව්‍යාපාර පරිසරය උපදර්ශකයේ සිදු වූ වර්ධනය සඳහා ඒක පුද්ගල දළ දේශීය නිෂ්පාදිතය (ද.දේ.නි.) සහ රැකියා නියුක්තිය සම්බන්ධ අංශවල වැඩි දියුණු වීම හේතු විය. සමාජ-ආර්ථික යටිතල පහසුකම් උපදර්ශකයේ වැඩිවීම කෙරෙහි අධිවේගී මාර්ග පද්ධතිය පුළුල් කිරීම සමඟ සිදු වූ මාර්ග පද්ධතියේ වර්ධනය, පාලම් සහ ගුවන් පාලම් ඉදිකිරීම, විදුලිබල පහසුකම් සහ නලජලයේ ගුණාත්මකභාවය යනාදියෙහි වැඩි දියුණු වීම ප්‍රධාන වශයෙන් දායක විය. පරිසරයේ පිරිසිදුකම සහ වායුගෝලයේ ගුණාත්මකභාවය පහළ යෑම හේතුවෙන් 2017 වසර තුළ දී ‘ජන ජීවිතයේ යහපැවැත්ම’ උපදර්ශකයෙහි අඩු වීමක් පෙන්නුම් කළ ද, එහි අනෙකුත් සංරචක වන සෞඛ්‍ය පහසුකම් පැවතීම, අධ්‍යාපන පහසුකම් පැවතීම හා එහි ගුණාත්මකභාවය, මහ ජනතාවගේ වත්කම් සහ විනෝද කටයුතු සඳහා වූ පහසුකම් පැවතීම හා භාවිතය යනාදියෙහි වර්ධනයක් දක්නට ලැබුණි.

ගැනුම් කළමනාකරුවන්ගේ දර්ශකයෙහි සියලුම උප දර්ශක, කඩඉම් මට්ටම ලෙස ගැනෙන දර්ශක අගය වන 50.0 ට වඩා වැඩි අගයක් වාර්තා කරමින් 2018 සැප්තැම්බර් මාසයට සාපේක්ෂව නිෂ්පාදන ක්‍රියාකාරකම් වැඩි වේගයකින් වර්ධනය වූ බව පෙන්නුම් කරයි. ඔක්තෝබර් මාසයෙහි දක්නට ලැබුණු මෙම වර්ධනය සඳහා ප්‍රධාන වශයෙන්ම, උත්සව සමයෙහි ආහාර සහ පාන නිෂ්පාදනය සඳහා ඇතිවන ඉල්ලුම හේතුවෙන්, නව ඇණවුම් සහ නිෂ්පාදනවල දක්නට ලැබුණු වර්ධනය හේතු විය. ආහාර සහ පාන අංශයෙහි සේවා නියුක්තිය, සෘතුමය ප්‍රවණතා හේතුවෙන් යම් වර්ධනයක් පෙන්නුම් කළද, සමස්ත සේවා නියුක්තියෙහි අඩු වර්ධනයක් පෙන්නුම් කරන ලදී. සේවකයන් සොයාගැනීමේ අපහසුතාවය හේතුවෙන්, රෙදිපිළි සහ නිමි ඇඳුම් නිෂ්පාදන අංශයෙහි සේවා නියුක්තියෙහි දක්නට ලැබුණු අඩු වර්ධනය මේ සඳහා ප්‍රධාන වශයෙන් හේතු විය.