கொழும்பு நுகர்வோர் விலைச் சுட்டெண்ணின் (கொநுவிசு, 2021=100)  ஆண்டிற்கு ஆண்டு மாற்றத்தினால் அளவிடப்பட்டவாறான முதன்மைப் பணவீக்கம், 2023 நவெம்பரின் 3.4 சதவீதத்திலிருந்து 2023 திசெம்பரில் 4.0 சதவீதத்திற்கு அதிகரித்தது. முதன்மைப் பணவீக்கத்தில் ஏற்பட்ட இவ்வதிகரிப்பானது அநேகமாக 2023 நவெம்பரில் இலங்கை மத்திய வங்கியினால் எதிர்பார்க்கப்பட்ட எறிவுகளிற்கு இசைவாக காணப்படுகின்றது.

ஐந்து மாதகால தொடர்ச்சியான பணச் சுருக்கத்தின் பின்னர், உணவு வகையானது 2023 நவெம்பரில் பதிவுசெய்த 3.6 சதவீதப் பணச் சுருக்கத்திலிருந்து 2023 திசெம்பரில் 0.3 சதவீதம் கொண்ட பணவீக்கத்தைப் பதிவுசெய்தது.  அதேவேளை, உணவல்லாப் பணவீக்கம் (ஆண்டிற்காண்டு) 2023 நவெம்பரின் 6.8 சதவீதத்திலிருந்து 2023 திசெம்பரில் 5.8 சதவீதத்திற்கு வீழ்ச்சியடைந்தது. கொ.நு.வி.சுட்டெண்ணின் மாதாந்த மாற்றம், 2023 திசெம்பரில் 0.89 சதவீதத்தைப் பதிவுசெய்தமைக்கு உணவு வகையின் பொருட்களில் அவதானிக்கப்பட்ட 1.16 சதவீதம் கொண்ட விலை அதிகரிப்புக்கள் மற்றும் உணவல்லா வகையின் பொருட்களில் அவதானிக்கப்பட்ட 0.27 சதவீதம் கொண்ட விலை குறைப்புக்கள் ஆகியவற்றின் இணைந்த தாக்கம் காரணமாக அமைந்தது. பொருளாதாரத்தின் அடிப்படைப் பணவீக்கத்தினைப் பிரதிபலிக்கின்ற மையப் பணவீக்கம் (ஆண்டிற்காண்டு) 2023 நவெம்பரின் 0.8 சதவீதத்திலிருந்து 2023 திசெம்பரில் 0.6 சதவீதமாக குறைவடைந்தது.

வர்த்தகப் பற்றாக்குறையானது ஓராண்டிற்கு முன்னைய நிலையுடனும் 2023 ஒத்தோபர் மாதத்துடனும் ஒப்பிடுகையில் ஏற்றுமதிகளில் ஏற்பட்ட மேம்பாடு மற்றும் இறக்குமதிகளில் ஏற்பட்ட சுருக்கம் என்பவற்றின் இணைந்த தாக்கத்தின் காரணமாக 2023 நவெம்பரில் சுருக்கமடைந்து காணப்பட்டது. ஏற்றுமதிகள் 2022 செத்தெம்பர் மாதத்திலிருந்து முதலாவது தடவையாக ஆண்டிற்கு ஆண்டு வளர்ச்சியொன்றினைப் பதிவுசெய்தன.

மாதாந்த தொழிலாளர் பணவனுப்பல்கள் ஐ.அ.டொலர் 500 மில்லியன் தொகையினை விஞ்சித் தொடர்ந்தும் காணப்பட்டதுடன் 2022இன் தொடர்புடைய காலப்பகுதியுடன் ஒப்பிடுகையில் 2023 நவெம்பரில் குறிப்பிடத்தக்க அதிகரிப்பொன்றினைப் பதிவுசெய்தன.