தொகைமதிப்புப் புள்ளிவிபரத் திணைக்களத்தின் தற்காலிக தரவுகளின்படி, உண்மை நியதிகளில் 2015இல் இலங்கைப் பொருளாதாரம் முன்னைய ஆண்டின் 4.9 சதவீதத்துடன் ஒப்பிடுகையில் 4.8 சதவீதத்தினால் வளர்ச்சியடைந்தது. 2015இல் பொருளாதாரத்தின் விரிவிற்கு, 2015ஆம் காலப்பகுதியில் 5.3 சதவீதத்தினால் வளர்ச்சியடைந்த பணிகளுடன் தொடர்பான நடவடிக்கைகளே முக்கியமாக உதவியளித்தன. வேளாண்மை மற்றும் கைத்தொழிலுடன் தொடர்பான நடவடிக்கைகளும் முறையே 5.5 சதவீதத்தினாலும் 3.0 சதவீதத்தினாலும் விரிவடைந்து இவ்வாண்டின் வளர்ச்சிக்கு நேர்க்கணியமாகப் பங்களித்துள்ளன. 2015இன் வளர்ச்சிக்கு நுகர்வுக் கேள்வியில் ஏற்பட்ட அதிகரிப்பு பெருமளவிற்குத் தூண்டுதலாக அமைந்த வேளையில் முதலீட்டு நடவடிக்கைகள் வீழ்ச்சியைக் காட்டின.  

விரிவடைந்த வர்த்தகப் பற்றாக்குறை, சுற்றுலா வருவாய்களில் காணப்பட்ட தொடர்ச்சியான உயர்ந்த வளர்ச்சி மற்றும் மிதமான தொழிலாளர் பணவனுப்பல்கள் என்பனவற்றின் காரணமாக 2015 திசெம்பர் மாதத்தில் இலங்கையின் வெளிநாட்டுத் துறை கலந்த செயலாற்றமொன்றினைக் காட்டியது. ஒன்றுசேர்ந்த அடிப்படையில் 2015ஆம் ஆண்டுப் பகுதியில் வர்த்தகப் பற்றாக்குறை சிறிதளவால் விரிவடைந்த வேளையில் சுற்றுலாவிலிருந்தான வருவாய்கள் குறிப்பிடத்தக்களவிற்கு அதிகரித்தன. அதேவேளை, 2015இல் தொழிலாளர் பணவனுப்பல்கள் சிறிதளவு வீழ்ச்சியைப் பதிவு செய்தன. 2015ஆம் ஆண்டுப் பகுதியில் சென்மதி நிலுவையின் நிதியியல் கணக்கிற்கான உட்பாய்ச்சலின் முக்கிய மூலமாக  நாட்டிற்கான இரண்டு பன்னாட்டு முறிகளின் வழங்கலும் இந்திய றிசேர்வ ;வங்கியின் பரஸ்பர பரிமாற்றல் ஒழுங்குகளும் காணப்பட்டன.

முழுவடிவம்