අවධමන තත්ත්වය අඛණ්ඩව පස්වන වරටත් 2025 ජූලි මාසයේ දී ලිහිල් විය. ඒ අනුව, කොළඹ පාරිභෝගික මිල දර්ශකයෙහි (කො.පා.මි.ද., 2021=100)1 වාර්ෂික ලක්ෂ්‍යමය වෙනස මගින්, 2025 ජුනි මාසයේ දී වාර්තා වූ සියයට 0.6ක මතුපිට අවධමනයට සාපේක්ෂව 2025 ජූලි මාසයේ දී සියයට 0.3ක සුළු අවධමනයක් වාර්තා කළේය.

ඉදිකිරීම් කටයුතුවල තවදුරටත් වර්ධනයක් පිළිබිඹු කරමින්, ඉදිකිරීම් කටයුතු සඳහා වන ශ්‍රී ලංකා ගැනුම් කළමනාකරුවන්ගේ දර්ශකය වන සමස්ත ක්‍රියාකාරකම් දර්ශකය,  2025 ජුනි මාසයේ දී දර්ශකාංක 58.6ක් ලෙස වාර්තා විය. ව්‍යාපෘතිවල සිදු වූ ධනාත්මක වර්ධනය මෙන්ම ස්ථාවර මිල මට්ටම් තුළින්  පෙන්නුම් කළ පරිදි, ඉදිකිරීම් කර්මාන්ත කටයුතු සඳහා පවතින හිතකර වාතාවරණය මේ සඳහා විශේෂයෙන්ම හේතු වූ බව සමීක්ෂණයට ප්‍රතිචාර දැක්වූ බොහෝ දෙනෙක් සඳහන් කළහ.

ශ්‍රී ලංකා බලධාරීන් විසින් ක්‍රියාත්මක කරන ලද ආර්ථික ප්‍රතිසංස්කරණ, ආර්ථික වර්ධනය අපේක්ෂිත මට්ටම අභිබවා යෑම, උද්ධමනය එහි ඉලක්කය කරා ළඟා වීම, විදේශ සංචිත ගොඩනැගීම සහ රාජ්‍ය මූල්‍ය ආදායම් වැඩි දියුණු වීමත් සමග ඵල දරමින් තිබේ.

වෙළඳ ප්‍රතිපත්ති අවිනිශ්චිතතාව සහ භූ දේශපාලනික ආතති මධ්‍යයේ සාර්ව ආර්ථික ස්ථායිතාව ආරක්ෂා කිරීම, ආර්ථිකය යථා තත්ත්වයට පත් වීම තහවුරු කිරීම, සහ ශ්‍රී ලංකාවේ කම්පනවලට ඔරොත්තු දීමේ හැකියාව ගොඩනැගීම සඳහා මෙම ප්‍රතිසංස්කරණ වැඩසටහන පවත්වාගෙන යෑම ඉතා වැදගත් වේ.

ශ්‍රී ලංකා මූල්‍ය බුද්ධි ඒකකය2025  ජූලි 09 වන දින ලක්සම්බර්ග් හි පැවති එග්මන්ට් සමූහයේ 31 වන සමුළුවේ දී, ඕමාන රාජ්‍යයේ මූල්‍ය තොරතුරු සඳහා වූ ජාතික මධ්‍යස්ථානය සමඟ අවබෝධතා ගිවිසුමකට එළැඹිණි. 2006 අංක 6 දරන මුදල් ගනුදෙනු වාර්තා කිරීමේ පනතේ විධිවිධාන ප්‍රකාරව, මුදල් විශුද්ධිකරණය, ඒ ආශ්‍රිත මූලික වැරදි සහ ත්‍රස්තවාදයට මුදල් සැපයීමේ වරද සම්බන්ධයෙන් මූල්‍ය බුද්ධි තොරතුරු හුවමාරු කරගැනීම සඳහා මෙම අවබෝධතා ගිවිසුම මගින් පහසුකම් සපයයි.