අපනයන ආදායම ඉහළ යෑමේ වේගයට වඩා වැඩි වේගයකින් ආනයන වියදම් ඉහළ යෑම හේතුවෙන් 2019 වසරේ පෙබරවාරි මාසයට සාපේක්ෂ ව 2020 වසරේ පෙබරවාරි මාසයේ දී වෙළෙඳ හිඟය පුළුල් විය. පාස්කු ඉරු දින ප්‍රහාරවල බලපෑමෙන් අනතුරු ව අපේක්ෂා කළ මට්ටමට වඩා වේගයෙන් යථා තත්ත්වයට පත් වූ සංචාරක කර්මාන්තය, 2020 වසරේ පෙබරවාරි මස අග සිට කොවිඩ්-19 (COVID-19) ව්‍යාප්ත වීම වසංගත තත්ත්වයක් බවට පත්වීමත් සමඟ නැවත බලපෑමට ලක් විය. විදේශ සේවා නියුක්තිකයින්ගේ ප්‍රේෂණ 2020 වසරේ පෙබරවාරි මාසයේ දී පෙර වසරට සාපේක්ෂ ව වර්ධනයක් වාර්තා කළ අතර, රාජ්‍ය සුරැකුම්පත් වෙළෙඳපොළෙහි සහ කොළඹ කොටස් වෙළඳපොළෙහි විදේශීය ආයෝජන ශුද්ධ ගෙවීම් වාර්තා කළේ ය. 2020 වසරේ මාර්තු මස දෙවන සතිය දක්වා සාපේක්ෂ ලෙස ස්ථාවර ව පැවති ශ්‍රී ලංකා රුපියල, මාර්තු මස අග භාගයේ සිට 2020 වසරේ අප්‍රේල් මස මැද භාගය දක්වා සැලකිය යුතු ලෙස අවප්‍රමාණය වූ නමුත් ඉන් පසු ව ස්ථාවර වෙමින් 2020 වසරේ මැයි මස පළමු සතිය තුළ දී සැලකිය යුතු අතිප්‍රමාණය වීමක් වාර්තා කළේ ය. 2020 වසරේ මාර්තු මස සිට කොවිඩ්-19 වසංගතය හේතුවෙන් විශේෂයෙන් ම, භාණ්ඩ අපනයන, සංචාරක කර්මාන්තය, විදේශ සේවා නියුක්තිකයින්ගේ ප්‍රේෂණ සහ විදේශීය ආයෝජන යන අංශ ඇතුළු ව, විදේශීය අංශයේ ක්‍රියාකාරිත්වය සැලකිය යුතු බලපෑමකට ලක් වනු ඇතැයි අපේක්ෂා කෙරේ.
-
External Sector Performance - February 2020
-
Central Bank of Sri Lanka Implements Extraordinary Regulatory Measures to Provide Liquidity to Banks amidst COVID-19 Outbreak
කොවිඩ්-19 මගින් බලපෑමට පත් පුද්ගලයන් සහ ව්‍යාපාර සඳහා සහන සැලසීම වෙනුවෙන් ක්‍රියාත්මක කරන ලද ණය සහන යෝජනා ක්‍රමය සහ බැංකුවල අනෙකුත් හදිසි ද්‍රවශීලතා අවශ්‍යතා හේතුවෙන් බලපත්‍රලාභී වාණිජ බැංකු හා බලපත්‍රලාභී විශේෂිත බැංකුවල (බලපත්‍රලාභී බැංකුවල) ද්‍රවශීලතාවට සහ අනෙකුත් ප්‍රධාන කාර්ය සාධන දර්ශකයන් හට සිදු විය හැකි අහිතකර බලපෑම සලකමින්, බැංකුවල ද්‍රවශීලතා මට්ටම් ශක්තිමත් කිරීමේ අවශ්‍යතාව ශ්‍රී ලංකා මහ බැංකුවේ මුදල් මණ්ඩලය විසින් සැලකිල්ලට ගෙන ඇත.
-
Delisting of Sri Lanka by the European Commission from its List of High Risk 3rd Countries
යුරෝපා කොමිසම විසින් 2020 මැයි මස 7 දින ප්‍රකාශයට පත්කරන ලද මුදල් විශුද්ධිකරණය වැළැක්වීමේ සහ ත්‍රස්තවාදයට අරමුදල් සැපයීම මැඩපැවැත්වීමේ උපායමාර්ගික දුර්වලතා සම්බන්ධයෙන් ඉහළ අවදානම් සහිත තුන්වන පාර්ශවයේ රටවල් ලැයිස්තුවෙන් ශ්‍රී ලංකාව ඉවත් කිරීමට තීරණය කර ඇත.
-
The Central Bank of Sri Lanka Further Reduces Policy Rates to Support Economic Activity
ශ්‍රී ලංකා මහ බැංකුවේ මුදල් මණ්ඩලය 2020 මැයි 06 වැනි දින පැවැති විශේෂ රැස්වීමේ දී වර්තමාන මුදල් ප්‍රතිපත්ති ස්ථාවරය සමාලෝචනය කිරීමෙන් අනතුරු ව, ශ්‍රී ලංකා මහ බැංකුවේ නිත්‍ය තැන්පතු පහසුකම් අනුපාතිකය (SDFR) සහ නිත්‍ය ණය පහසුකම් අනුපාතිකය (SLFR), පිළිවෙළින් සියයට 5.50 සහ සියයට 6.50 දක්වා පදනම් අංක 50කින් 2020 මැයි මස 06 වැනි දින ව්‍යාපාර කටයුතු අවසානයේ සිට බල පැවැත්වෙන පරිදි අඩු කිරීමට තීරණය කළේ ය. උද්ධමන පීඩන අඩුවෙන් පවතින වාතාවරණයක් තුළ කොවිඩ්-19 වසංගතය හේතු කොට ගෙන ඇති වන අහිතකර ආර්ථික බලපෑම්වලට මුහුණ දීම සඳහා ආර්ථිකයට තවදුරටත් සහාය වීමේ ඇති අවශ්‍යතාව සලකා බලමින් මුදල් මණ්ඩලය මෙම තීරණයට එළඹුණි. මෙම තීරණයත් සමඟ මුදල් තත්ත්වයන් ලිහිල් කිරීම සඳහා ගන්නා ලද අනෙකුත් ක්‍රියාමාර්ගවලට අමතර ව 2020 වසරේ මේ දක්වා කාලය තුළ ශ්‍රී ලංකා මහ බැංකුවේ ප්‍රතිපත්ති පොලී අනුපාතික පදනම් අංක 150කින් අඩු කර ඇත.
-
The Central Bank of Sri Lanka Extends the Deadlines to Facilitate Covid-19 Affected Businesses and Individuals
කොරෝනා ව්‍යසනය හේතුවෙන් මූල්‍ය ආයතනයන්ගේ ඇතැම් ගනුදෙනුකරුවන් විසින් මුහුණ පා ඇති දුෂ්කරතා සැලකිල්ලට ගනිමින් ගනුදෙනුකරුවන් හට ණය සහන සහ 4% වාර්ෂික පොලී අනුපාතය යටතේ මාස දෙකක කාරක ප්‍රාග්ධන ණය පහසුකම් ලබා ගැනීම සඳහා ඉල්ලුම් කිරීමේ (2020 අප්‍රේල් 30 වැනි දිනට යෙදී තිබූ) අවසාන දිනය 2020 මැයි15 දින දක්වා දීර්ඝ කිරීමට ශ්‍රී ලංකා මහ බැංකුව තීරණය කර ඇත. එමෙන් ම, රුපියල් 500,000ට වඩා අඩු වටිනාකමින් යුතු වලංගු කාලය ඉක්ම ගොස් ඇති චෙක්පත්, බලපත්‍රලාභී බැංකු විසින් 2020 මැයි15 දින දක්වා වලංගු සේ සැලකිය යුතු වේ. මෙම කාල සීමා දීර්ඝ කිරීම 2020 අප්‍රේල් 28 වැනි දින නිකුත් කරන ලද 2020 අංක 06 දරණ චක්‍රලේඛය මගින් ක්‍රියාත්මක කර ඇත.
-
CCPI based Inflation decreased in April 2020
කොළඹ පාරිභෝගික මිල දර්ශකයේ (2013 = 100) ලක්ෂ්‍යමය වෙනස මගින් මනිනු ලබන මතුපිට උද්ධමනය 2020 මාර්තු මාසයේ පැවති සියයට 5.4හි සිට 2020 අප්‍රේල් මාසයේ දී සියයට 5.2 දක්වා පහළ යන ලද අතර, මේ සඳහා 2019 අප්‍රේල් මාසයේ පැවති ඉහළ පදනම් අගය හේතුවෙන් ඇති වූ සංඛ්‍යානමය බලපෑම පුර්ණ වශයෙන් දායක විය. මේ අතර, 2020 අප්‍රේල් මාසයේ දී ආහාර කාණ්ඩයේ ලක්ෂ්‍යමය උද්ධමනය සියයට 13.2ක් වූ අතර, ආහාර නො වන කාණ්ඩයේ ලක්ෂ්‍යමය උද්ධමනය 2020 මාර්තු මාසයේ පැවති සියයට 2.5හි සිට 2020 අප්‍රේල් මාසයේ දී සියයට 2.1ක් දක්වා පහළ ගියේ ය.
-
The Central Bank of Sri Lanka Releases its Annual Report for the Year 2019
1949 අංක 58 දරන මුදල් න‍ීති පනතේ 35 වන වගන්තියට අනුව, ශ්‍රී ලංකා මහ බැංකුවේ මුදල් ම‍ණ්ඩලයේ 70 වැනි වාර්ෂික වාර්තාව මහ බැංකු අ‍ධිපති දේශමාන්‍ය මහාචාර්ය ඩබ්ලිව්. ඩී. ලක්‍‍ෂ්මන් මහතා විසින් ගරු අග්‍රමාත්‍ය සහ මුදල්, ආර්ථික හා ප්‍රතිපත්ති සංවර්ධන අමාත්‍ය මහින්ද රාජපක්‍ෂ මැතිතුමා වෙත පි‍ළිගන්වන ලදී.
-
The Central Bank of Sri Lanka Imposes Maximum Interest Rates on Pawning Advances of Licensed Banks
රන් භාණ්ඩ උකස් අත්තිකාරම් සඳහා බලපත්‍රලාභී බැංකු විසින් දැනට අය කරනු ලබන වාර්ෂීක පොලිය 12% - 17.5% දක්වා පරාසයක පවතින බව ශ්‍රී ලංකා මහ බැංකුව විසින් නිරීක්ෂණය කර ඇත. කොවිඩ්-19 ව්‍යසනය නිසා ඇති වූ අයහපත් ආර්ථික තත්ත්වය හමුවේ, තම කෙටි කාලීන මූල්‍ය අවශ්‍යතා සපුරා ගැනීම සඳහා රන් භාණ්ඩ උකසට තබන අඩු ආදායම්ලාභීන්ට සහනයක් සැලසීිමේ අවශ්‍යතාව සලකමින් ශ්‍රී ලංකා මහ බැංකුවේ මුදල් මණ්ඩලය විසින් බලපත්‍රලාභී බැංකුවල රන් භාණ්ඩ උකස් අත්තිකාරම් පහසුකම් සඳහා උපරිම පොලී අනුපාත සීමා පැනවීමට තීරණය කරන ලදි.
-
Withdrawal of Primary Dealership by Union Bank of Colombo PLC
යුනියන් බෑන්ක් ඔෆ් කලම්බු පීඑල්සී (යුනියන් බෑංකුව) විසින් කරන ලද ඉල්ලීමක් සලකා බලමින් ශ්‍රී ලංකා මහ බැංකුවේ මුදල් මණ්ඩලය විසින් 2020 මැයි මස 01 වන දින සිට ක්‍රියාත්මක වන පරිදි යුනියන් බැංකුවට සිය ප්‍රාථමික වෙළෙඳ මෙහෙයුම් කටයුතු නැවැත්වීමට අවසර ලබා දුන් බව මහජනතාවට මෙයින් දන්වා සිටී. යුනියන් බැංකුව විසින් LankaSettle පද්ධතියේ සෘජු අලෙවිකරු සහභාගීකරුවෙකු ලෙස ඉදිරියටත් කටයුතු කරනු ඇති අතර සිය ගනුදෙනුකරුවන් වෙනුවෙනුන් නිර්ලේඛනගත රජයේ සුරැකුම්පත් ගනුදෙනු සිදු කිරීම සහ සිය ගනුදෙනුකරුවන්ගේ ගිණුම් LankaSecure පද්ධතියේ පවත්වා ගෙන යෑම සිදු කරනු ඇත.
-
NCPI based Inflation decreased in March 2020
ජාතික පාරිභෝගික මිල දර්ශකයේ (2013 = 100) ලක්ෂ්‍යමය වෙනස මගින් මනිනු ලබන මතුපිට උද්ධමනය, 2020 පෙබරවාරි මාසයේ පැවති සියයට 8.1හි සිට 2020 මාර්තු මාසයේ දී සියයට 7.0 දක්වා පහළ ගියේ ය. ආහාර කාණ්ඩයේ අයිතමවල මිල ගණන්හි සිදු වූ මාසික පහළ යෑම මේ සඳහා හේතු විය. ඒ අනුව, 2020 පෙබරවාරි මාසයේ දී සියයට 16.3හි පැවති ආහාර කාණ්ඩයේ ලක්ෂ්‍යමය උද්ධමනය, 2020 මාර්තු මාසයේ දී සියයට 14.1 දක්වා පහළ ගිය අතර, ආහාර නො වන කාණ්ඩයේ 2020 මාර්තු මාසයේ ලක්ෂ්‍යමය උද්ධමනය සියයට 1.8ක් විය.