2025 ජූලි මාසයේ දී ඉදිකිරීම් කටයුතු තවදුරටත් වර්ධනය විය

ඉදිකිරීම් ක්ෂේත්‍රයේ තවදුරටත් වර්ධනයක් පිළිබිඹු කරමින්, ඉදිකිරීම් කටයුතු සඳහා වන ශ්‍රී ලංකා ගැනුම් කළමනාකරුවන්ගේ දර්ශකය වන සමස්ත ක්‍රියාකාරකම් දර්ශකය,  2025 ජූලි මාසයේ දී දර්ශකාංක 60.0ක් දක්වා ඉහළ ගියේය. ඉදිකිරීම් කර්මාන්තයේ ධනාත්මක වර්ධන ප්‍රවණතාවක් දක්වමින් ඉදිකිරීම් ව්‍යාපෘතිවල ස්ථාවර වැඩිවීමක් පවතින බව සමීක්ෂණයට ප්‍රතිචාර දැක්වූ බොහෝ දෙනෙක් සඳහන් කළහ.

ප්‍රතිචාර දැක්වූ බොහෝ දෙනෙක් විසින් මාර්ග සංවර්ධන සහ පෞද්ගලික අංශයේ ව්‍යාපෘතිවල වර්ධනයක් පිළිබඳව ජූලි මාසයේදී සඳහන් කරන ලද අතර, එය මාසය තුළ දී නව ඇණවුම් දර්ශකය තවදුරටත් ඉහළ යාමට දායක විය. මේ අතර, ජූලි මාසය තුළ පැවති ස්ථාවර රැකියා තත්ත්වයන් පිළිබිඹු කරමින් සේවා නියුක්ති දර්ශකය කඩයිම් මට්ටමේ පැවතුණි. තොග මිලදී ගැනීම් දර්ශකය වර්ධනයක් වාර්තා කළ අතර, ඇණවුමක් සැපයීමට සැපයුම්කරුවන්ට ගතවන කාලය මාසය තුළ දී ඉහළ මට්ටමක පැවතුණි.

සම්පූර්ණ ලිපිය

Published Date: 

Friday, August 29, 2025