2021 ඔක්තෝම්බර් මස 06 වන දින සිට බලපැවැත්වන පරිදි මූල්‍ය පද්ධති ස්ථායීතා උපදේශන කමිටුව (FSSCC), මූල්‍ය අංශයේ ප්‍රවීණයන් කිහිපදෙනෙකුගෙන් සමන්විත වන පරිදි නැවත ස්ථාපිත කරන ලදි. ලංකාක්ලියර් පුද්ගලික සමාගමෙහි සභාපති, ආචාර්ය කෙනෙත් ද සිල්වා මහතා මෙම කමිටුවේ සභාපති වශයෙන් පත් කොට ඇත. තවද, ශ්‍රී ලංකා මූල්‍ය සමාගම් සංගමයේ සභාපති, නිරෝෂන් උඩගේ මහතා; ශ්‍රී ලංකා ණය තොරතුරු කාර්යාංශයේ අධ්‍යක්ෂක/ සාමාන්‍යාධිකාරී; සී. එන්. එස්. එන්. ඇන්තනි මහතා; ශ්‍රී ලංකා බැංකු සංගමයේ සභාපති, එල්. එච්. ඒ. ලක්ෂ්මන් සිල්වා මහතා; ප්‍රයිස්වෝටර්හවුස්කූපර්ස්හි කළමණාකාර හවුල්කරු, සුජීව මුදලිගේ මහතා; ශ්‍රී ලංකා වරලත් ගණකාධිකාරීවරුන්ගේ ආයතනයේ උප සභාපති, සංජය බණ්ඩාර මහතා; ලංකා වාණිජ මණ්ඩලයේ සභාපති, විශ් ගෝවින්දසාමි මහතා; ජනාධිපති නීතීඥ, කුශාන් ද අල්විස් මහතා; කොළඹ වරාය නගර ආර්ථික කොමිසමේ වැඩ බලන අධ්‍යක්ෂක ජනරාල්, සාලිය වික්‍රමසූරිය මහතා; එල්ඹ්එල්සී හෝල්ඩින්ග්ස් පීඑල්සී හි සමූහ කළමණාකාර අධ්‍යක්ෂක, කපිල ජයවර්ධන මහතා සහ ජෝන් කීල්ස් හෝල්ඩින්ග්ස් පීඑල්සී හි සභාපති, ක්‍රිෂාන් බාලේන්ද්‍රන් මහතා නැවත පිහිටුවන ලද මූල්‍ය පද්ධති ස්ථායීතා උපදේශන කමිටුවෙහි සෙසු සාමාජිකයින් වේ. මූල්‍ය පද්ධති ස්ථායීතා උපදේශන කමිටුව ශ්‍රී ලංකා මහ බැංකුවෙි ක්‍රියාත්මක වන ඉහළ මට්ටමේ කමිටුවකි. එය මූල්‍ය පද්ධති ස්ථායීතාව සහ මූල්‍ය අංශයේ සංවර්ධනය පිළිබඳ ප්‍රතිපත්ති සම්පාදනය කිරීම සඳහා මහ බැංකුවට සහාය වීම පිණිස අදහස් හා උපදෙස් ලබාදෙන සාකාච්ජාවලට පහසුකම් සැපයීමේ අරමුණින් පිහිටුවන ලද්දකි. ශ්‍රී ලංකා මහ බැංකුවේ සාර්ව විචක්ෂණතා අධ්‍යයන දෙපාර්ත්මේන්තුව මූල්‍ය පද්ධති ස්ථායීතා උපදේශන කමිටුවේ ලේකම් කටයුතු සිදු කරයි.
Thursday, October 14, 2021